عبثياتٌ أولى على ورق: الراحلون أنواع

الراحلون أنواع...

راحل مش راجع مُجبرالعمر كله يتنفى,
جعلوه فانجعل..

وراحل مشى ...كان عايز ينسى ويتنسى,
والنسيان ابن التعود عمره ما جه بالبعاد

وواحد لما بص وراه مفكَّرش كتير
يمكن راجع تانى ويمكن مش خسران حاجة...
وعكسه اللى فكّر عمره كله وخد قرار أخير
أصلهم قالوله ما بيجيش بعد التفكير الا الحكمة
والحكمة بنت الخبرة عمرها ما جت بالتفكير

وراحل قالك: طب ما هناك أحسن من هنا
ولما وصل لمبتغاه اتقلبت هِناه لهِناكُه
واتقلبت معاها رغبته فالرحيل
والرغبة بنت الحس
والحس ميزورش غير انسان أصيل

وراحل ماكنش عنده استعداد يبيع حريته
خلع وسابلك مسئوليته
قله يا راحل : أنت لسه معرفتش
ان الحرية بنت المجدعة عمرها ما جت بالهروب؟

وراحل صبر فترة ومقدرش يكمل
كره المكان
اتقِ شر الحليم اذا غَضِب
واتقِ شر الصبور ان رأى أن رحيله وجَب

وراحل سافر
قالك: أنا طموحى كبير ونجاحى مش هنا
قالها لما فقد العزيمة أنه يغيَّر واقع مكانه
متسرع ولا عندوش هِنا ارادة,
والنجاح مش ابن الطموح بس
ولا عمره جه بالتسرع ولا بالهوادة

وراحل أبدى حان أجله
لبس الأكفان وقررتله الأقدار
يا ترى يا راحل عملت لدنيتك ولا لأخرتك؟

الراحلون أنواع..والراحل الأخير
يرحل ولا يتخلّاش
حكمته فانه بيتعلم ولا ينساش
يرحل من هنا لهناك
بس لا يبقى هنا عالطول
وهناك نفس الشئ ميبقاش
بيسجل حضوره فالاتنين
باقى لحد مالدنيا تقوله:
جه دورك وصار لازم ترحل..
فاهم كويس ان الدنيا متستحملش غير رحيل واحد كبير